Cors su manovris di disostruzion pediatriche e alimentazion complementâr: a van indenant cun sucès i incuintris formatîfs pai gjenitôrs te Basse Furlane

Al è za plui di un an che, in gracie de colaborazion tra Ospedâl e Teritori de aree materne e infantîl, tes sedis di Tisane e Palme si tegnin cun regolaritât, une volte al mês, i cors di disostruzion pediatriche.

I cors a son tignûts di miedis de Struture complesse di Pediatrie dal Presidi Ospedalîr Tisane-Palme, in colaborazion cu lis ostetrichis dai consultoris di Tisane, S. Zorç di Noiâr e Palme; si davuelzin ogni mês, te sede dal Consultori di Palme e tal Ospedâl di Tisane.

Il progjet al è il risultât di un lavôr di colaborazion tra la Pediatrie dal Ospedâl di Tisane-Palme direte de dot.e Elisabetta Miorin e il servizi Minôrs e Famee de Basse Furlane diret de dot.e Barbara Pittino, espression di une integrazion zovevule tra ospedâl e teritori.

Imparâ lis manovris di disostruzion pediatriche al è fondamentâl par cui che al viôt di un frut, stant che la ostruzion des viis aeriis o il scjafoiament cun cuarp estrani, come mangjative o un toc di un zuiatul, purtrop al è un avigniment sfortunât che al pues sucedi soredut tai prins agns di vite.

Di fats, il scjafoiament cun cuarp estrani al è une des causis di muart principâls tai fruts cun mancul di 3 agns e lis statistichis a fevelin a clâr: in medie in Italie ogni an a pierdin la vite in cheste maniere tra i 30 e i 50 fruts, e, stant ai dâts uficiâi dal ISTAT, il 27% des muarts classificadis tant che "acidentâls", tai fruts dai 0 ai 4 agns, si verifiche par vie de inalazion di mangjative o di un altri "cuarp estrani".

"Chescj numars a puedin spaventâ cui che al viôt di un frut piçul e nol cognòs lis modalitâts di intervent, par chest al è une vore impuartant istruî i gjenitôrs e lis personis che a viodin di un frut in maniere che a sedin pronts tal câs di un incident di cheste fate" e aferme la dot.e Sara Rosati, pediatre e referente dal progjet. "I gjenitôrs che a partecipin ai nestris cors si sintin confuartâts de cognossince di chestis semplicis manovris, in maniere di jessi pronts a intervignî subit in câs di bisugne. Dut câs, ducj a puedin riprodusi cun facilitât chestis manovris e il tas di sucès al è alt se si lu fâs cun prontece, prime de pierdite di cussience dal frut".

Zontâ mangjativis solidis te alimentazion dal frutin al rapresente un moment pardabon delicât, cun pussibii pericui di scjafoiament, ancje pal fat che al frutin no i son ancjemò vignûts fûr ducj i dincj e nol à svilupât dal dut la coordenazion tra mastiâ e gloti.

I cors a son pensâts tal specific par ufrî dutis lis informazions necessariis a chei che a viodin di un frut: si scomence spiegant cemût intervignî in câs di scjafoiament e si va indenant cuntun moment di pratiche, fasint provâ suntun manichin pediatric lis manovris di disostruzion a ducj i partecipants, fin cuant che no saran in stât di fâlis in autonomie.

Te seconde part dal incuintri si trate chê che e ven clamade la "prevenzion primarie" dal scjafoiament, ven a stâi i "tais sigûrs" e lis modalitâts coretis par preparâ e ufrî i prins pascj tal cors dal dislatament, puartant la atenzion su lis mangjativis plui o mancul siguris e su lis modalitâts coretis par preparâlis.

Il cors al è completât cun nozions fondamentâls su la composizion de diete tai fruts a scomençâ di cuant che si tache a dislatâju, te otiche de prevenzion e de promozion de salût tai famôs "1000 dîs", che a van de gravidance ai prins 3 agns dal frut, periodi fondamentâl pe salût di dute la vite, cuant che stîi di vite sans e atents a metin la fonde par un disvilup adeguât, ridusint la incidence di malatiis cronichis te etât adulte (come diabete, obesitât e malatiis cardiovascolârs).

Il calendari dai prossims incuintris

Te otiche di une prevision capilâr dal pericul di scjafoiament in etât pediatriche, i cors a son indreçâts a ducj i gjenitôrs e a ducj chei che a viodin di frutins e a rapresentin une ocasion valide par imparâ lis manovris di fâ.

Lis prossimis datis dai incuintris programâts pal 2026 a son chestis:
ai 22 di Avrîl a Tisane
ai 27 di Mai a Palme
ai 17 di Jugn a Tisane
ai 22 di Lui a Palme
ai 5 di Avost a Tisane
ai 23 di Setembar a Palme
ai 21 di Otubar a Tisane
ai 25 di Novembar a Palme
ai 16 di Dicembar a Tisane

I cors a son sore nuie e par notâsi o vê informazions su sedis e oraris si puedin contatâ chescj riferiments:

• par Tisane: 0431 529366 o ben pueste eletronichemf.cervignano.latisana@asufc.sanita.fvg.it 
• par Palme: 0432 921820 o ben pueste eletronichemf.cervignano.latisana@asufc.sanita.fvg.it