"Cattura i ricordi": servizi par miorâ la cualitât de vite des personis cun decjadiment cognitîf e dai lôr familiârs

Sostignî personis e fameis cusint un vistît su misure che al meti adun i ricuarts e lis storiis di vite di ognidun, chest al è il cûr di “Cattura i Ricordi”, realizât dal Servizi Sociâl dai Comuns (SSC) tal ambit dal teritori de Cjargne – Aziende Sanitarie Universitarie dal Friûl Centrâl, in colaborazion cu la Cooperative Sociâl Itaca, a pro des personis cun decjadiment cognitîf e dai lôr familiârs, par miorâ la cualitât de vite di ducj i doi tra i mûrs di cjase midiant soluzions pratichis.

Di une bande, si vûl creâ un contest che al meti al centri l’anzian cun demence e i siei dibisugns, di chê altre, si vûl condividi cun ducj i familiârs assistents i obietîfs di un percors fat di azions semplicis di podê ripeti te vite di ogni dì: chescj a son i aspiets plui concrets dal servizi che, propit parcè che si fonde su la biografie des personis, al cjape ogni volte une forme gnove. Capî il passât de persone cun demence e valutâ i dibisugns, lis dificoltâts e lis risorsis di dutis lis personis tocjadis, a son i prins pas di un percors struturât che al partìs dal cûr, o ben de famee, e al fâs operâ in sinergjie une scuadre multi professionâl che e cjape dentri assistent sociâl, animadôr, professionist di terapie e psicolighe.

Il servizi, inviât tal 2016 e inovatîf pal Friûl de Alte, al à regjistrât un disvilup une vore svelt e un interès in cressite de bande des fameis, protagonistis di un percors di incuintris fats a cjase, studiâts di pueste par podê operâ in mût simultani e personalizât sedi cui anzians cun demence, sedi cui familiârs che ur dan assistence. Cun di fat, il servizi al met in opare azions comuns: al lavore su la partecipazion aes ativitâts significativis di ogni dì, su la stimolazion des abilitâts residuis, su la autostime dai anzians e, tal stes timp, su la scolte de condivision e sul svilup di competencis specifichis dai familiârs.

La eficacie di “Cattura i Ricordi”, che al è fondât su teoriis che a dan impuartance al supuart par dut il nucli familiâr, e je peade in mût diret al grât di partecipazion dai familiârs assistents, che il servizi al vûl compagnâ cun sugjeriments par rindi plui facile la assistence cuotidiane dal lôr familiâr. Lis direzions par procedi a son trê: l’aspiet relazionâl cun informazions su la gjestion domestiche dal anzian, la valutazion dal ambient di vite e lis ativitâts de vite cuotidiane e/o di socializazion; aspiets che tal stes timp a judin i familiârs a sintîsi mancul inadeguâts e bessôi.

Ce che si augurin i operadôrs - che a son simpri presints dongje des fameis, ancje ae fin dal percors, par dâur lis rispuestis plui adatis aes diviersis necessitâts - al è di sensibilizâ dute la comunitât sul argoment des demencis e di svilupâ une rêt di servizis e di buinis pratichis par agjî in mût tempestîf, corâl e smirât tal sostignî l’anzian e la sô famee.

Par informazions in merit a “Cattura i ricordi”, che al è part de rêt di servizis che il SSC al ative par sostignî i anzians fragjii e par fâju restâ a cjase lôr, al è pussibil indreçâsi al Servizi Sociâl clamant il numar 331 2674338.