"Andare fino all’alba": la cjançon dai fantats de Cjargne nassude intun laboratori cun Marco Anzovino

Cjatâsi pe prime volte, fidâsi e contâsi dutis lis sfumaduris emotivis par podê costruî insiemi la lôr cjançon: ve ca cualchi particolâr dal laboratori di song writing puartât indevant di Marco Anzovino e indreçât a un grup vari di adolessents de Cjargne, autôrs de cjançon coletive "Andare fino all’alba".

Etât, divignince e atitudins diviersis a àn rapresentât il valôr in plui pe esperience educative inmaneade dal Servizi sociâl dai Comuns dal ambit teritoriâl de Cjargne – Aree di Disvilup di Comunitât – ASUFC, in colaborazion cu la Citât di Tumieç, cu la Cooperativa Itaca, e cu la presince des educadoris Alessia Gallizia e Alessia Pugnetti: la musiche e je stade il lengaç plui adat par ufrî ai adolessents un spazi par sintîsi libars di esprimi sensibilitât e creativitât, in plui che di cjatâ il cûr di cjalâsi dentri e di lassâsi viodi intune maniere plui autentiche.

"Andare fino all’alba" e je une palete di emozions piturade dai components dal grup, che prime dal progjet no si cognossevin, e che a àn sielt di fidâsi un di chel altri metint in musiche concets profonts e cualchi volte discomuts. La particolaritât dal toc - scrit, interpretât e regjistrât dome in trê dîs, intun studi mobil, cu la conduzion dal educadôr Marco Anzovino e de coleghe Sara Busetto – e je la capacitât dai fantats di fevelâ tal stes timp di amôr e di aviliment, di ansie e di lûs, cence dâ un judizi positîf o negatîf, ma dome ricognossintju cun semplicitât e vivintju tant che aspiets de vite di ogni om, che a ‘nt rindin la esistence plene. La cjançon e conte di cemût che al sedi pussibil frontâ ancje la rabie, la amarece, la malinconie cence fâsi sorevinci, cjalant a ce che al ven dopo, al cambiament di umôr, al plasê dal incuintri cun ce che di gnûf la vite e risierve simpri.

Il videoclip al è stât regjistrât ai prins dal mês, dal videomaker Matteo Pavanello tal curtîl dal Museo Carnico delle Arti popolari “Michele Gortani” di Tumieç: un lûc plen di bielece, che al unìs la storie e il futûr dal teritori. Di fat, tant che i lôr predecessôrs, lis gjenerazions gnovis di cjargnei a dimostrin di no vê pôre di cjalâ devant e di volêsi “alenâ” par passâ fûr i alts e i bas de vite tipics di ogni etât. La dedizion dimostrade dai fantats dilunc dal cors dal laboratori e ricuarde la particolaritât dai cjargnei: la disposizion a sporcjâsi lis mans e a meti anime e cûr inte realizazion di un progjet che al puarte la lôr firme, come cheste cjançon, ma al passe i confins unint ducj i adolessents.

Si ringracie pe disponibilitât e pe colaborazion lis fameis dai partecipants, la Comunitât di Mont de Cjargne, Carniamusei, Museo Carnico delle Arti popolari “Michele Gortani” di Tumieç e il grup di fonics e di videomakers.