Riabilitazion cardiologjiche
La Riabilitazion Cardiologjiche, in sens moderni, e perseguìs il benstâ fisic e psicologjic dal pazient; e favorint la stabilitât cliniche (o ben, evitant gnûfs peioraments), ridusint lis eventuâls disabilitâts consecuentis ae malatie, e supuartant la riprese di un rûl atîf inte societât. In tiermins tecnics, l'obietîf al è duncje chel di ridusi il pericul di events cardiovascolârs sucessîfs par miorâ la cualitât de vite e incidi in maniere positive tal complès su la sorevivence.
La Prevenzion cardiologjiche, fondamentâl intal percors riabilitatîf, e je fate prin di dut dal pazient, che al à di cognossi l’ABC de malatie, i siei sintoms principâi, l'ûs dai farmacs e dai stîi di vite racomandâts.
Lis struturis di Cardiologjie e di Riabilitazion Cardiologjiche dal ospedâl di Tumieç e di San Denêl, e di Cardiologjie Riabilitative IMFR “Gervasutta” a àn volût dotâsi di un strument moderni che al puedi jessi doprât dai pazients par:
- “tornâ a passâ” i argoments tratâts intes lezions di riabilitazion
- fâ la “home rehabilitation” (o ben la riabilitazion di cjase)
- acedi al teleconsult medic e infermieristic di gjenar educazionâl
- cjatâ rispueste aes domandis plui frecuentis o pûr fâ altris domandis ai cardiolics e ai infermîrs di cardiologjie
Lis vuestris propuestis a saran preseadis e utilis par miorâ chest strument.
Marika Werren – Cardiologjie Riabilitative Responsabile IMFR “ Gervasutta”
Antonio Di Chiara – Diretôr Cardiologjie e Riabilitazion Cardiologjiche San Denêl e Tumieç