I esperts a rispuindin – FAQ

Cuant che o misuri la pression arteriose (PA) e no ài i valôrs otimâi, ce aio di fâ?

Siguriti di vê cjoltis lis medisinis di ogni dì. No sta a misurâ la pression se tu sês agjitât o rabiât, se tu âs a pene fat ativitât fisiche o se tu âs bevût di pôc un cafè. Torne misure la PA par trê voltis a intervai di 4-5 minûts: se i valôrs a son simpri plui bas, fâs la medie des ultimis dôs misurazions. Indreciti al to MMG se:

• Dopo une setemane tu vâs indenant a rilevâ valôrs de pression > 160/100
• Dopo un mês tu continuis a rilevâ valôrs de pression > 140/90 ma < 160/100

Se no rivi al THR (training heart rate)?

No tu âs di preocupâti, nol è un valôr assolût: miôr imparâ a scoltâsi.

Aio di assumi i farmacs prescrits par dute la vite?

I farmacs che a fermin la progression de aterosclerosi e lis complicazions (statinis, antiagregants…) a son di cjoli A VITE. Chei altris farmacs a saran modulâts dal specialist o dal MMG su la fonde des cundizions clinichis. Visiti: NO tu âs mai di sospinditi la terapie di bessôl.

Cuant che o sint il desideri di fumâ ce aio di fâ? Cun cui puedio fevelâ?

Fevele cul to miedi di medisine gjenerâl. Tal câs di ricjadude o di dificoltât a molâ, indreciti ai Centris Antifum.

Trops cafês puedio bevi intune zornade?

La rispueste ae cafeine e je subietive. Dut câs, si consee di no passâ i 3 cafês in dì.

Puedio bevi vin? Trop?

Sì ma cun moderazion, o ben une tace in dì pes feminis e dôs tacis pai oms, miôr intant che si mangje.

Cuant puedio tornâ a fâ ativitât sessuâl?

Si pues tornâ a fâ ativitât sessuâl dopo dôs setemanis di une angjoplastiche e dopo almancul 4 setemanis di un intervent cardiochirurgjic, in cundizions stabilis e in mancjance di sintoms.

Cuant puedio tornâ a vuidâ?

Dopo di une sternitomie al è ben spietâ di 4 a 6 setemanis par prevignî traumis al sterni in vie di consolidament. Se tu âs fate une angjoplastiche tu puedis tornâ a vuidâ dopo di une setemane.

Puedio tornâ a lavorâ intal ort?

Sì, ma evitant i lavôrs plui pesants (par esempli svangjâ) tai prins 3 mês; in ogni câs al è ben no lavorâ intes oris plui cjaldis di Istât e in chês plui fredis di Invier.

Puedio lâ a cjaminâ in mont?

Sì, ma dome se si è alenâts (cjaminâ a pas svelt ogni dì almancul miezore); tache cun percors facii.

Puedio lâ in biciclete?

Sì, nol è cuintriindicât, al baste che al sedi un bon ecuilibri e sigurece. Cui che invezit al vûl ricjapâ il ciclisim a nivel sportîf al varà di fâ une prove di sfuarç.

Puedio zuiâ di tenis?

Confrontiti cul cardiolic o cul miedi di medisine gjenerâl. Se no son cuintriindicazions specifichis, tu puedis tornâ a zuiâ 3 mês dopo dal event acût cu lis sbalizadis e cun partidis in dopli. Dopo un periodi di alenament adeguât (2-3 mês) tu puedis ricjapâ lis partidis in singul; ricuarditi di fâ simpri une fase di riscjaldament.