Ûs dai dispositîfs di protezion des viis aeriis
vinars 5 di Zenâr dal 2024
Daûr dal cuadri epidemiologjic corint leât ai câs di infezion di SARS-CoV-2 e su la fonde de gnove circolâr de Direzion Centrâl Salût, si racomande il massim rispiet des precauzions standard.
In particolâr, l’ûs dai dispositîfs di protezion des viis aeriis, de bande dai operadôrs sanitaris, al è conseât in dutis lis fasis assistenziâls intai ospedâi (reparts di degjence ordenarie, diurne e ambulatoris), e intes struturis sociosanitaris e socioassistenziâls, cjapant dentri lis struturis di ospitalitât e di degjence lungje, lis residencis sanitariis assistenziâls, i hospice, lis struturis di riabilitazion, lis struturis residenziâls par anzians, ancje no autosuficients e disabii.
L’ûs dai dispositîfs di protezion des viis aeriis al è conseât ai visitadôrs/acompagnadôrs e al personâl des ditis in apalt intai reparts di degjence ordenarie e diurne, intai servizis diagnostics, intes areis ambulatoriâls e in particolâr intes salis di spiete dai ambulatoris, Pront Socors e Ponts di Prin Intervent.
L’ûs dai dispositîfs di protezion des viis aeriis, se tolerâts, al è conseât ai pazients ricoverâts intant dai trasferiments dentri des struturis.
Si invide a rinfuarçâ lis racomandazions par doprâ i dispositîfs di protezion des viis aeriis in ducj i spazis comuns dai ospedâi e des struturis e dai servizis teritoriâi (salis di spiete, coridôrs, assensôrs e v.i...), ancje midiant di une cartelonistiche adate che e consei l’ûs dai dispositîfs, massime ai sogjets fragjii.
Si ricuarde infin che i familiârs, i acompagnadôrs e i visitadôrs no àn di acedi aes struturis se a àn sintoms compatibii cul COVID-19, tal câs di positivitât o se a san di jessi jentrâts in contat strent cuntun sogjet positîf intai ultins 5 dîs.