Donazion de AIL Udin-Gurize ODV ae Ematologjie di Udin

Lunis ai 4 di Març te sale de Direzion Gjenerâl de ASUFC, la sezion Udin-Gurize de AIL (associazion taliane cuintri des leucemiis) e à fat une donazion ae Cliniche Ematologjiche dal Ospedâl di Udin cuntune piçule cerimonie.

A son stâts regalâts 31 jets eletrificâts gnûfs cun ducj i acessoris (comodins, supuarts puarteflebo) par un valôr totâl di cirche 86.000 euros. I malâts che a varan di fermâsi plui a dilunc te cliniche, a podaran stâ plui comuts graciis aes regolazions che chest gnûf furniment al ufrìs; ancje la ativitât dal personâl assistent e sarà facilitade di cheste tecnologjie, tignint cont che cualchi jet al à ancje un dispositîf par pesâ la persone.

 Ae cerimonie a àn partecipât il Diretôr Gjenerâl de ASUFC Denis Caporale, il Diretôr Sanitari David Turello, il Diretôr de Cliniche Ematologjiche Renato Fanin e i rapresentants de AIL: il President Giuseppe Gioffrè, la Vice Presidente Marisa Loszach e la conseire Loretta Tonon Spangaro.

La AIL Udin-Gurize si è simpri impegnade une vore par judâ i malâts ematologjics te vite di ogni dì: in plui di cheste poie, i siei obietîfs a son il svilup e la promozion de ricercje sientifiche par prevignî e curâ lis malatiis dal sanc e il miorâ il servizi e la assistence di chescj pazients e des lôr fameis intes realtâts diferentis che a son sul teritori.

Di fat, intai agns passâts, la associazion e à finanziât ricercjadôrs universitaris, borsis di studi par zovins miedis, programs di ricercje e di sperimentazion cliniche, contrats di lavôr par professioniscj pal aiût psicologjic; cun di plui, la AIL e à ancje contribuît une vore a rinovâ la Cliniche comprant furniments e materiâi sanitaris par che i pazients a podedin stâ miôr.

Cul program  “Case AIL” - nassût vincj agns indaûr, cuant che e jere presidente Maria Grazia Zanon Santuz, comprant e metint in regule cualchi apartament dongje dal Ospedâl  - si son podûts mandâ a cjase prime dal timp pazients traplantâts che a rivavin di fûr regjon, e judâju a tornâ intes lôr fameis.

Al è in chest contest chi che si à di viodi ancje cheste donazion che e sostituìs, cun jets plui modernis, chei des degjencis e dal Centri Traplants de Cliniche Ematologjiche, come che al jere za stât fat tal 2015, in ocasion dal trasferiment dal Paveon 15 inte struture gnove.

Lis declarazions:

Il Diretôr Gjenerâl, Caporale: " Graciis ae AIL par cheste donazion, che e fâs part di un progjet plui grant e nus permet di costruî insiemi i percors plui adats pai malâts: doprant ben lis risorsis, che no son dome materiâls, o rispuindint aes esigjencis dai pazients de Cliniche Ematologjiche che e je une struture fondamentâl dal sisteme sanitari de ASUFC e di dute la Regjon".

Il Diretôr de Cliniche Ematologjiche, Fanin:"In chescj agns la ricercje e je une vore cressude. O vûl ringraciâ di cûr la AIL, une associazion che si dimostre tant presinte te nestre struture: vuê o viodìn dome une part piçule di dut ce che e fâs ogni dì dentri e fûr de Cliniche".

Il president de AIL, Gioffré: "E je la buine volontât di tancj volontaris de AIL che nus permet di puartâ indevant progjets pe Cliniche e di viodi i risultâts concrets dal impegn di ducj. O sin a disposizion de Struture: vuê, midiant de ricercje, o podìn alfin fevelâ di malatiis che fin a cualchi an indaûr no cognossevin, cjatant fûr gnovis manieris par frontâlis".